تكاليف الدراسة في امريكا ماجستير
تكاليف الدراسة في امريكا ماجستير
النظام التعليمي:
-يعني ايه: Credit hour?
الناس بتقيس التعليم بحاجة اسمها عدد ساعات الدراسة.
يعني مادة فيها 50 ساعة شرح من المدرس تساوي للطالب 5 نقط دراسية
50 hours = approx 5 credits
وده بيسهل على الجامعات إن الطلبة تتنقل من جامعة لجامعة, أو تاخد مواد مختلفة و تجمع نقط لغاية التخرج. أو حتى يدرس مادة من سنة 2 قبل ما يخلص سنة أولى... طالما المواد مش معتمدة على بعض.
في أوروبا كلها في نظام موحد اسمه
ECTS
European Credit Transfer System
تقريبا كل 10 ساعات تساوي نقطة واحدة.
-مين من حقه يقدم على ماجيستير؟
أي طالب بكالوريوس معاه أكتر من 180 نقطة يقدر يقدم على ماجيستير...وعشان البكالوريوس في مصر و بلادنا ممكن يكون 5 سنين في حين انه البكالوريس في أوروبا و غيرها 3 سنين أو 4 مع ماجيستير
فحضرتك أكيد بعد 3 سنين جامعة أو 4 بالتحديد معاك أكتر من اللي يكفيك عشان تقدم على ماجيستير!
قصدي ممكن تقدم فعلا قبل ما تتخرج من الكلية وانت في آخر سنة.
-هل الماجيستير كله واحد؟
الماجيستير في الغالب نوعين
MSc and MAS
ماجيستير علوم أو ماجيستير دراسات عليا
و الخلاصة اللي بتتكرر في كل دولة إن في ماجيستير سنة و ماجيستير سنتين... طيب إيه الفرق؟
الفرق في عدد النقط, دايما ماجيستير السنة بيدي نقط ما بين 60-90
بينما ماجيستير السنتين بيدي 120 نقطة في المتوسط
طيب دي تفرق معاك في إيه؟
لو ناوي تشتغل ... يبقى ماجيستير سنة واحدة كفاية
لو ناوي تكمل دكتوراه يبقى ماجيستير السنتين أهم
لو السي في بتاعتك على قدها ... يبقى أحسن سنتين
لو عايز وقت زيادة عشان تعرف تدور على شغل أو دراسة... يبقى أحسن سنتين
-الوقت؟
تقديم الجامعة بيفرق عن الشغل, لازم تعرف إن في جامعات بتطلب ورق زيادة مع الماجيستر ... وده معناه إن ممكن تقدم في السنة التانية و تقعد سنة فاضي لغاية ما تاخد
Admissons for PhD or MSc
يعني مثلا لو انت خريج 2011 و قدمت 2011 على ماجيستير أو دكتوراه حيجيلك القبول 2012
فلازم دايما تكون بتفكر لسنتين قدام على الأقل... انت عايز تعمل ايه في حياتك و مستقبلك المهني؟
-في أنواع للجامعات؟
الجامعات أنواع كتير... بالأخص
نوع أكاديمي و نوع تطبيقي. ومن دولة لدولة بيفرق. بس في الغالب الأكاديمي أعلى من التطبيقي.
و أعلى من الاتنين أي جامعة مرتبطة بمركز أبحاث أو بشركة.
-تكاليف الدراسة؟
المنح صعبة في الماجيستير... تكاد تكون منعدمة إن لم تكن من دولة أو منظمة مانحة في عدد قليل جدا من الجامعات بيدي منح في الماجيستير مقارنة بالدكتوراه. على عكس الدكتوراه اللي دايما مقرونة بدخل ثابت. في الماجيستير:
في الغالب التكاليف في حدود 7000 يورو في العام لكل بلاد الاتحاد الأوروبي فيما عدا إنجلترا
إنجلترا التعليم فيها صناعة... عشان كدة مصاريف الجامعة لوحدها رقم فلكي في الغالب, .
طب الفلوس دي -7000- هي دي المصاريف؟
لأ. دي مصاريف السكن و الأكل و الشرب و المواصلات. في دول تقدر تشتغل فيها و ترجع 4000-6000 بالكتير في السنة بشكل طبيعي زي ألمانيا. وفي ناس بتشتغل أكتر بس غالبا حيكون على حساب دراستك.
وفي جامعات بتسهل العمل الطلابي بتلاقي المعلومة على موقع الجامعة أو حد اتخرج منها يبلغك.
يعني تقدر تقول ال 7000 دول منهم 4000 لسكنك بس في السنة و الباقي أكل و شرب.
و تقدر توفر في كل الأحوال و تصرف إجمالي 5000 في السنة وتبقى عايش فعلا على حرف. ولو الجامعة وفرت سكن أو عمل ثابت أو القوانين سمحت بعمل في شركة كمتدرب... يبقى الدنيا كلها سهلة و جميلة
لو حتضغط على نفسك آخر 10 حاجات, يبقى محتاج تستلف بشكل مؤقت عشان الفيزا 7000 يورو. حتصرف منهم 3000 للسكن و الباقي مش حتحتاجه لو اشتغلت و كفيت نفسك أكل و شرب و معظم تكاليف سكنك إن لم يكن كلها.
-مين من حقه يقدم على دكتوراه؟
المتعلم في الشرق الأوسط:
يكون معاه ماجيستير أو ورقة بتقول حيخلص امتى
وفي الغالب حزيد على دراسته سنة
Pre-Doc
ساعات الناس بتسميها معادلة, ولكن هي في الحقيقة سنة محو أمية...
المتعلم في أوروبا:
لو معاه ماجيستير سنة أو أقل من 120 نقطة بيضطر ياخد كورسات أو سنة
pre-doc
و اللي جاهز ممكن يبدأ مباشرة
ممكن تجاوز سنة ال
Pre-Doc?
أي نعم... بالتفاوض مع المشرف. --اسألني على انفراد
-الدكتوراه كام سنة؟
على حسب البلد !
إنجلترا و فرنسا و أيرلندا ثلاث سنين
ألمانيا ممكن توصل 5 سنين
بقية البلدان 4 سنين
طب إيه الفرق؟
غالبا في حاجتين أساسيتين: الوضع الضريبي و ثانيا وهو الأهم قيمة المنحة. منح إنجلترا و فرنسا غالبا على قد حالاتها و مافيش مقارنة بفلوس ألمانيا و هولندا مثلا.
يعني تخلص بسرعة و تعيش شحات ... أو تاخد وقت أطول شوية و تعيش نسبيا مرتاح. وكلها شحاته :-)
بخلاف إن الوقت مفيد ليك في دراستك بالأساس
الوضع الضريبي مفيد لأن بعد عدد سنين معين ممكن تاخد إقامة دائمة بحسب البلد, وده بيسهل ليك لاحقا بدل البطالة إلخ.
وعليه فإن أغلب البلاد ستعمل أن يكون وضعك الوظيفي طالب منحة و ليس موظف يدفع الضرائب...
اللي بيحدد نوع الجهة المانحة و نوع الوظيفة.
-طب أجيب منحة ازاي؟
بشوف المنح 3 أنواع:
أولا: منح من منظمات
ثانيا: منح من دول
ثالثا: منح أعمال
الصنف الأول والتاني في منظمات مانحة بتطلب منك تسجل في جامعة و بتديك الفلوس و أمثلة هنا:
Element, Daad, Erasmus,
الصنف الثاني مماثل, بس المانح دولة و دي بتلاقيها على موقع الدولة, زي هيئة البعثات في مصر أو موقع الحكومة السويسرية...أو الأمريكية ... إلخ
النوع الثالث وهو الأهم و الموجود أكتر:
positions
يعني في مشروع وبيجي معاه الفلوس بتاعته و بنقدم فيها...
المنح عادة جزء من العمل
يعني بتروح على موقع الجامعة أو المركز أو الشركة و بتلاقي قائمة بالوظائف الخالية ... في الغالب بيكون مشروع محدد سلفا و ناقص بس حضرتك تتقدم للوظيفة أو المنحة... بحسب الجهة المانحة و شروطها.
-في أنواع للدكتوراه؟
طبعا! ولازم تبقى مركز انت بتعلم دكتوراه ليه!
الدكتوراه بشوف انها 3 أنواع:
دكتوراه نظرية:
ودي مهمة للي بيشتغل أكاديمي أو عايز يكمل
post-doc
أو من الآخر حيكمل في الجامعة كمدرس بشكل رئيسي
أهم ميزاتها إنك ممكن تنشر شغلك براحتك و تحقق نجاج شخصي, بس محدود بإمكانيات الجامعة اللي انت مسجل فيها
دكتوراه صناعية:
ودي بتكون بالتعاون مع شركة و بالتبعية بتأهلك للعمل في الصناعة كعالم أو استشاري أو باحث
و بالتبعية مش مصرح ليك بنشر كتير من شغلك... بالعكس الشركة حتفرض عليك عدد محدود و معلومات محدودة للنشر.
بس الميزة الأهم إن سنين الدكتوراه بتتحسب عليك سنين خبرة مش سنين تعليم
دكتواه المعاهد البحثية
ودي خليط من الاتنين ... معاهد بتتعاون مع جامعات لتنفيذ مشاريع للشركات.
فإذا كان العمل الأول ل25 سنة لقدام, الدكتوراه الصناعية لمنتج في خلال 2-5 أعوام
تبقى الدكتوراه البحثية لمنتج كمان 10 سنين.
النشر مش براحتك قوي... بس معاك دعم فلوس من شركة يكفي تعمل اللي نفسك فيه... مش زي الجامعة محدود. و في نفس الوقت سنين الشغل محسوبة سنين خبرة نسبية... و اللي بيفرق في الأخير مدى تعاونك مع الشركات أو تنفيذك لمشروعات
الكلام دي ينطبق على العلوم البحثية في الهندسة و البيولوجي و الزراعة و يمكن الجيولوجيا وغيرها.
في تخصصات الطب في دراسة عشان تبقى طبيب... وفي الحالة دي محتاج لغة البلد , ولكن في أعمال بحثية أخرى. يعني ممكن تكون طبيب باحث باللغة الإنجليزية في أسبانيا مثلا.
كل نقطة فيما سبق ليها مقام, بس قولت أكتب الخطوط العريضة في كل نوع. لو عندك أسئلة اكتبها أدناه و ح أحاول أرد عليها كلها مرة واحدة.
