الدراسة فى أوكرانيا

درست هندسة بترول و الحمد لله عادلت الشهادة و خدت كارنيه النقابة، عايش (مش بصورة دائمة) في مدينة لفيف (Lviv) و مدينة أيفانو فرانكيفسك (Ivano-Frankivsk) المدينة اللي درست فيها...

*** الحياة في أوكرانيا رخيصة نوعا ما (150-200 دولار تكفيك معيشة -أكل و تنقلات- في الشهر), حسب المدينة اللي انت فيها, أغلى المدن (كييف, أوديسا) و بالنسبة ليا المدن ديه أخر مدن أفكر أزورهم لو رايح سياحة... فرص الشغل تكاد تكون معدومة من غير لغة اوكرانية أو روسية, و حتى لو معاك لغة ممكن تشتغل بطريقة غير رسمية بمرتب 100-150 دولار في الشهر إلا بقى لو ليك حد يظبطلك حاجة هناك...

*** الشعب الاوكراني أصبح ودود أكتر و متقبل الأجانب من بعد المشكلة اللي حصلت مع روسيا في 2013 و أدت لتدهور الاقتصاد و ده كان سبب كبير ان 70% من الشباب و 40% من الناس عامتا يسافروا يشتغلوا بره أوكرانيا و بالتالي بدأوا يعانوا من الغربة و العنصرية ضدهم, و ده خلاهم ينظروا للأجانب بشكل مختلف

(الدولار لحد 2007 كان ب 4 هريفنا – 2008 بقى ب 7-8 هريفنا – 2013-2014 بقى ب 27-30 هريفنا)

*** الجو هناك متقلب 80% من السنة, يعني ممكن تلاقي تغيرات في درجات الحرارة توصل ل 10-15 درجة في يومين... الشتاء هناك متوسط درجة الحرارة فيه (-10) (-20) و الصيف متقلب أكتر كمان و درجة الحرارة بتلعب فيه بين 25 و 15

*** نسبة البنات في أوكرانيا بالنسبة للولاد حوالي 3 ل 1 و ده سببه ان معدل انجاب البنات أكتر, بالإضافة لكده عدد كبير من الولاد مطلوبين للجيش بسبب المشاكل اللي بتحصل على الحدود مع روسيا... علشان كده نسبة الجواز عندهم بتقل مع الوقت (ف يا ريت نحاول نساعدهم و ربنا يجازيكوا كل خير)

*** أول حاجة الدراسة: -

مبدأيا معظم المكاتب نصابة و بيكدبوا على الناس بما أن الطلاب صغيرين و عايزين يسافروا و خلاص، أو أهلهم كبار في السن مش عندهم خلفية، و أنا بقول كلامي ده بعد ما شوفت طلاب كتير دافعين مبالغ خرافية, و فيه منهم أصلا أخدوا رفض من السفارة و الفلوس راحت عليهم... تخيل لما تكون دافع 2000 أو 2500 دولار و عنك حلم انك مسافر و تترفض و فلوسك تضيع و حلمك يضيع.

تكلفة الدعوة: 40-50 دولار ... و الدعوات الدراسية كلها واحدة و كلها بنفس السعر 

لو عن طريق مكتب, المكتب بيكون متسجل تبع وزارة التعليم, و بيدفع على كل راس بيجيبها حوالي 30-50 دولار (نقول 100 دولار علشان نخليهم يكسبوا) و نقول كمان بيدفع للجامعة 50-100 دولار-هدايا و أي كلام فاضي- علشان يخلي العلاقة مبنية على الحب (و ده في حالات قليلة و بيكون ليها أسباب تانية زي انه يظبطلك أمتحان القبول و ممكن يسهلك سكن الطلاب في الجامعة و هكذا و هكذا) ... يعني في المجمل المكتب -ممكن- يكون دافع 200 دولار في الدعوة (و أنا كده ببالغ) ... ف لما تلاقي مكتب بيقولك 2000 دولار أتعاب, ده معناه انه واكل عليك 1800-1900 دولار في جيبه علشان مشوار للجامعة, اللي غالبا بيكون صاحب المكتب بيجبها بنفسه أو فيه صحابه بيدرسوا هناك... طبعا المكاتب بتقول كلام تاني زي أنا هاخلصلك ورقك في السفارة (و ده أنت ممكن تعمله بنفسك) أو يقولك هاضمنلك الفيزا (و ده كدب علشان الفيزا اوراقك هي اللي بتحددها) و يقولك أستقبال من المطار و يفضل معاك في تخليص كل أوراقك ( كده كده المكتب مسؤول انه يكون في استقبالك علشان يخرجوك من المطار, و بالنسبة لتخليص بقيت الأوراق, ديه حاجة تافهة و في الجامعة أصلا بيقولوا لك و مش محتاجه حد يعملهالك)...

من الأخر أنا شايف ان لو المكتب بياخد 700-800 دولار ده يكون مكسب كبير ليه وفي نفس ذات الوقت مبلغ معقول في متناول الطالب المصري المتوسط محدود الزكاء.

طبعا بيكون فيه مصاريف الجامعة, و ديه أنت ممكن تعرفها من موقع الجامعة, و كده كده أنت اللي بتدفعها لما توصل و تبدأ تخلص أوراق الجامعة و أوراق الإقامة.

الإقامة كانت بتبقى على حسب المصاريف اللي انت دافعها, يعني لو دافع ترم واحد بتاخد إقامة 6 شهور, و لو دافع سنة بتاخد إقامة سنة, لكن دلوقتي بالنظام الجديد بتاخد إقامة حسب مدة الدراسة المتوقعة يعني لو هاتدرس هندسة هاتاخد إقامة 4 سنين و هكذا.. و ده مش بيكون بمصاريف إضافية, فلوس الإقامة و مصاريف الجامعة أنت بتدفعهم في البنك بنفسك بعد ما تاخد وصل من الجامعة بالمبلغ المطلوب سداده.

*** ثانيا، الهجرة:-

علشان نكون متفقين, مافيش هجرة في أوكرانيا... في إقامة دائمة و ديه ليها شروط زي (زواج – أملاك – بيزنس)

الجواز سهل في أوكرنيا, لو انت رايح هناك مش محتاج حاجة علشان تكتب عقد الجواز غير جواز السفر (و الكلام ده أنا بقوله عن خبرة و لو حد عايز يتأكد يدخل على موقع وزارة الداخلية و يشوف الأوراق المطلوبة -أو- لو ليك حد هناك خليه يروح المحكمة يسأل)

فيه مكاتب ليها سكك تقدر تعملك إقامة دائمة (بحوالي 4000-4500 دولار) و الجنسية (بحوالي 15000 دولار) ديه معلومات انا سألت عليها بنفسي و من مصادر موثوقة.... أنا مش بعمل الكلام ده و لا شغال مع حد, أنا بنقل المعلومات اللي اتأكدت منها علشان محدش يتنصب عليه

*** ثالثا, السياحة:-

الأوراق المطلوبة للسياحة زيها زي أي سفارة تانية – يقال انك لازم تكون مقدم تبع مكتب سياحة أوكراني (و في رأي الشخصي ده علشان انهم يضمنوا انك رايح سياحة فعلا و هاتدفع الفندق و كده... لكن فيه ناس أنا أعرفهم شخصيا سافروا سياحة من غير أي مكاتب...

الأماكن الأحلى بالنسبة لي, هي مدينة Lviv (مدينة تلقب ب باريس الصغيرة و هي تحفة معمارية و أهلها متحضرين و رخيصة و فيها European standard shopping و قريبة من مزارات سياحية مايعرفهاش ناس كتير زي جبل Bukovel لو عايز تتزحلق على الجليد, و نفق الحب Tunnel Of Love و كنائس جميلة و قلاع فوق جبال و متاحف و ترابيزات بيلياردو و بينج) 

و عامتا أنا هاكتب أسامي المدن اللي أنا شايفها جملية جدا و بداية من الأقرب لمدينة لفيف و لازم تتزار و أي عنده هاتف محمول أو حاسب الي حد يقدر يدخل على النت و يتصفح و يشوف تفاصيل أكتر عنها ( Uzhgorod – Truskaets – Yaremche – Chernobyl – Kiev – Dniprope